Kalingikhethanga, Ngalikhetha

UMUSA WANSUKU ZONKE

Kalingikhethanga, Ngalikhetha

“Kalingikhethanga, kodwa ngalikhetha mina  ukuthi lihambe liyothela izithelo – izithelo ezizahlala zinjalo. Lapho-ke uBaba uzalinika loba yini eliyicelayo ngebizo lami” uJohane 15:16.

Kulomdlalo esasiwudlala kudala singabantwana. Wawungowokukhetha. Abantwana babesenza isigombolozi, kungakhathalekile ukuba bangaki. Kwakuhlatshelwa kuthiwe, “Nyama yembongolo, kheth’ omthandayo”. Kuhlatshelwa-ke kunjalo wayengena phakathi kwesigombolozi omunye umntwana, abhode egida edinga amthandayo angamkhetha. Lowo amkhethayo wayengena laye esigombolozeni egida laye bebambene izandla. Bangagidagida abesebuyela endaweni yakhe umakhetha. Okhethiweyo sesala phakathi kwesigomboloze laye egida edinga amthandayo. Kubamnandi kokhethiweyo azizwe ukuba uyisithandwa, uyathandeka. Nxa okhethayo egida edinga, wonke umntwana uyabe efisa ukuthi ngabe kukhethwa yena. Kumnandi ukukhethwa. Kuyathokozisa.

KuNkulunkulu, kakho ongasala edanile ngokuthi kathandwa, kakhethwanga. Sonke singabakhethiweyo. UJesu efundisa abafundi bakhe, kunye lathi sonke lamhlanje, wathi yena ulivini, UNkulunkulu ngumlimi, thina sonke abantu sizingatsha. Wakhuluma ephakamisa ukuqakatheka kokuba thina esizingatsha kufanele sithele izithelo. Wathi izingatsha ezingatheliyo ziyaqunywa zitshiswe. Ezithelayo ziyanakekelwa zihlale kuye ukuze azenze zithele. Okuqakathekileyo yikuthi, iNkosi uJesu watsho wathi, “Kalingikhethanga, kodwa ngalikhetha mina …” uJohane 15:16. Mhla ngiwunanzelela umbhalo lo, awu ngezwa ngilokuthokoza okukhulu. Kumnandi ukuba ngokhethiweyo. Kodwa, indaba ayipheleli ekukhethweni zwi. Okhethiweyo kufanele aphume ijumo athele izithelo ezingajujukiyo. Ukuthela izithelo yilokhu ukulazi lokuliphila ilizwi likaNkulunkulu. Omaziyo njalo omazisayo uNkulunkulu wenza okuhle ngezikhathi zonke. Uba ungumuntu oqotho, olothando, olobuntu lakho konke okuhle okunjengokuba ngumuntu weqiniso, ulesithunzi, ulungile, uhlambulukile uba lakho ukuthela izithelo ezinhle kokomoya. Ungumuntu owenza intando yeNkosi uNkulunkulu. Kulesithembiso sokuthi lowo othela izithelo ezinhle  uzaphiwa langabe yini ayicelayo ngebizo leNkosi. Haleluya!

Wena wakhethwa. Lami ngakhethwa. Singabakhethiweyo sonke ngakho kumele siphile othandweni lweNkosi. Sonke siyafisa ukuthola izibusiso zeNkosi.   Ngiyazibuza, yiziphi izithelo engizithelayo? Wena-ke, yiziphi  ozithelayo? Nxa zingekho, qala lamhla. Wakhethwa. Thela izithelo.

Barbara Nkala