MAMA DORIS DUBE

Isifundo
Umdlalo lo ufundisa ukuqakatheka kokuba lejubane ekubalekeleni ingozi. Uyafundisa njalo ukuqakatheka kokulalela umzali, hatshi amaqili. Ufundisa lenhlakanipho lokumisa amacebo aphumelelayo.

Umdlalo
Kulo umdlalo kukhethwa abantwana ababili okuzathiwa bangoMama. Bema bekhangelene. Phakathi kwabo kuyabe kulebanga elingaba ngamamitha angamatshumi amabili kumbe njalo anganeno kusiya ngobukhulu bendawo. Kubanga eliphakathi laphakathi kwaboMama kuma umntwana oyedwa okuzathiwa yisilwane. Indawo yonke ephakathi kwaboMama kuthiwa ligusu. Abantwana bonke abayabe bezadlala umdlalo lo bema ngemva kukaMama oyedwa. UMama loya ongela bantwana uyamemeza. Kuyaphendulwana.

UMama wokuqala:         Bantwana! Bantwana!
Abantwana:                     Maaa!
UMama wokuqala:        Wozan’ ekhaya!
Abantwana:                    Siyesaba.
UMama wokuqala:        Lesabani?
Abantwana:                    Izilwane.
UMama wokuqala:        Izilwane kudala zaphela zathi du!

Abantwana labayana abacatshe ngemva kukaMama wesibili, bayaqala ukugijima besiya kuMama wokuqala bequma eguswini. Bagijima bevika isilwane. Isilwane sona siyazama ukubamba abantwana abanengi. Lowo esimthintileyo sebanjiwe laye sesiba yisilwane. Nxa abantwana sebecatshe ngemva kukaMama wokuqala, uyaqhubeka umdlalo.

UMama wesibili:            Bantwana! Bantwana!
Abantwana:                     Maaa!
UMama wesibili:            Wozan’ ekhaya.
Abantwana:                     Siyesaba.
UMama wesibili:            Lesabani?
Abantwana:                     Izilwane.
UMama wesibili:            Izilwane kudala zaphela zathi du!

Abantwana bayagijima njalo bequma igusu besiya kuMama wokuqala. Izilwane lazo zibamba abantwana abanengi. Umdlalo uyaqhubeka abantwana baze badliwe yizilwane bonke ngoba zibathintile bezama ukuquma igusu. Lowo ocina ukubanjwa kuthiwa yingqwele. Umdlalo ubusuqala kutsha kube laboMama abanye ababili, lesilwane esinye esisodwa, abantwana bacatshe ngemva kukaMama wokuqala, babizwe ngowesibili.