Ukunakekela Okumangalisayo
Empilweni esiyiphilayo, abantu abanengi abahlakaniphileyo babhala amaWili besaphila. IWili yincwadi elotshwa ngumuntu esaphila atsho ukuba nxa esedlulile impahla yakhe ufisa ithathwe ngubani. Kungaba yimfuyo, impahla alayo ngengendlu loba imota loba ifanitsha loba ibhizinisi ngokwayo. Ukuloba lawomazwi kwenza umuntu ahlaliseke ukuthi izithukuthuku zakhe azisoze ziwele ezandleni ezingayisizo. Nxa engumzali, uyabe efisa ukwabela abantwana bakhe ngendlela efiswa yinhliziyo yakhe, ngoba ebanakekela kakhulu engafisi bahlupheke, baswele, bahawule engasekho.
UJesu Khristu yiNkosi uMsindisi wethu. Sisindisiwe ligazi lakhe elachitheka ebethelwe esiphambanweni ukuze thina sikhululwe ebugqilini besono, silungisiswe, sibuyisane leNkosi uNkulunkulu. IWili esikhulume ngayo yande ukubhalwa umuntu esaphila esaqinile. Isimanga ngomusa lozwelo lesihawu seNkosi uJesu yikuthi, wathi esebethelwe eGoligotha elenga esiphambanweni, wabona unina uMariya labanye abalandeli bakhe ababekhathazekile bemlilela kunye lomfundi ayemthanda beseduze kwesiphambano sakhe. INcwadi ithi, “UJesu wathi ebona unina lapho lomfundi ayemthanda emi lapho eduze, wathi kunina, ‘Mama, nansi indodana yakho,’ wathi kumfundi, ‘Nangu unyoko.’ Kusukela kulesosikhathi umfundi lowo wamthatha unina wamusa ekhaya lakhe.”
Luthando olunganani lolu iNkosi ilenga esiphambanweni, isebuhlungwini obukhulu. Kodwa, yakwazi ukucabanga ngonina, ukuthi pho uyasala eseyini. Lokhu kusibonisa ukuthi umkakhe uJosefa waye esewadlula. INcwadi ayikhulumi ngaye uJesu esekuhlukuluzweni lekuhlutshweni. UJesu wacabanga ngomzali wakhe, wafisa ukutshiya emlungisele. Yikunakekela okumangalisayo lokhu. Yisibonelo esihle kakhulukazi kithi abantu.
Wena-ke? Ubonisa ngandlela bani ukunakekela labo obathandayo? Ungalindeli ukubonisa uthando lwakho olukhulu usugulela ukufa. Lutshengise lamhla. Bonisa bonke obacabangayo ukunakekela kwakho lamhlanje useselethuba, usaphila.
Barbara Nkala