Isaga lesi sikhuluma ngenja. Izinja ziyawathanda amathambo. Zilamazinyo aqinileyo kakhulu aqhoba amathamba aqinileyo. Ziyawathanda amathambo izinja. Lapho okuhlatshwe khona isifuyo, abantu sebedle bakhukhuza amathambo, kwasala abangawenelisiyo, angesimakleza; sebegqule bahotsha leminkantsho, bayazijikela izinja amathambo lawo. Ziyancintisana-ke izinja ukugama lawo mathambo loba ukuwadobha lapho ajikelwe khona, ziqhobe-ke zincinde. Inja iyananzelela ohlala eyipha amathambo. Ayisuki kuye. Ihlala ikhangelele ukuphiwa njalo amanye amathambo. Inja iyasondela njalonje ihlale iqaphile ukujikelwa amathambo, ngoba phela isijwayele ukuhlala iphiwa ikholisa.

Ngakho, isaga esithi ingaqhoba ithambo iyejwayela sitshiwo ngumuntu ezincengela, ecela ukuphiwa okuthile njalo, loba ukwenzelwa okuthile okuhle. Lo ngumuntu oseke waphiwa okuhle okuthile loba wenzelwa lokho. Nxa esephindela njalo efuna usizo uncenga ngawonala amazwi okuthi, ingaqhoba ithambo iyejwayela. UMoyo wathi encenga ukuthi umkhula wakhe ameboleke ubabhemi ukuze athwale isaka esiyagayisa, wahle waqala ngamazwi athi,

“Ingaqhoba ihambo iyejwayela mkhula wami. Bengicela ungeboleke uRayiboko ngiphanyeke isaka ngiyegayisela abantwana.”

Ikanti uMaNyoni laye wavukela komakhelwana wakhe uMaMhlanga wafika wathi, “Makhelwana, ingaqhoba ithambo iyejwayela. Bengicela ungichathekele amafutha ngiyefaka embhideni abantwana batshebe bakithi.”

Siyatshiwo lesisaga kuyisicelo sokuba ocelayo abuye asizakale ngoba esejwayele ukucela aphiwe loba asizwe. Impela, ingaqhoba ithambo iyejwayela.

Barbara Nkala