Ukugqibela Umthombo
Esinye isaga esitsho into yinye lokugqibela umthombo yilesi esithi, Ukunyela Emthonjeni. Lezizaga zikhuluma ngomuntu olitshapha njalo owehluleka ukunanzelela okumsizayo, okuzamsiza njalo kwelakusasa. Ngumuntu olobuthutha. Isaga lesi sitshiwo nxa ekhuzwa umuntu onjalo.
UFanyana wayeselusa inkomo zikayisemkhulu. Esegangeni khonale uthe esedle izithelo wezwa esewomele ukunatha amanzi. Wakhumbula umthombo ayevame ukubona omakhelwana besikha khona amanzi. Waya lapho wanatha waqeda konke ukoma. Uthe esekholiwe, nango egqibele umthombo lowo. Wayekhohlwa ukuthi kwesilandelayo isikhathi angoma njalo afise ukuqeda umhawu wamanzi. Ikanti njalo wayesonela abanye abazakuza befisa ukukha amanzi loba ukunatha lapho. Kwasekuyamela baphande kutsha. Kubi lokho.
Ikanti njalo omunye olihlongandlebe laye uthi nxa esenathe waqeda umhawu wokoma, abe esequtha lapho esenza ingcekeza. Lowo ngumoya omubi njalo owobuthutha ngoba kwelakusasa angeke anathe lapho anyele khona. Labakha lapho amanzi bangeke bakhe emthonjeni olengcekeza.
UnakaDade wabolekwa imiganu ngunakaSolani ngoba elabantu bemzini abanengi, eyakhe imigani ingaseneli. Kuthe sebeqedile ukudla wayibuthelela imiganu engalaneni phandle yahlala khonalapho kwaze kwaba ngelilandelayo unakaSolani eseyifuna imiganu yakhe. Umntwana owathunywa ukuyilanda wafica igiqika phandle lenkukhu ziseqa phezu kwayo isigcwele inhlabathi lokomela izitshwala zezolo. Waqoqa eyakwabo umntwana wahamba. Uthe eyibona unakaDade watshaya izandla wabamba owangaphansi wathi, “Hayi-bo! Imiganu yami ebolekwe ngesihle ihlanzekile yiyo le! Lokhu yikugqibela umthombo qotho. Angiphindi ukumeboleka unakaSolani!” Impela, wayesuke wanyela emthonjeni unakaSolani.
Barbara Nkala