Kulomhlabeleli odumileyo kakhulu owelizweni laseNigeria okuthiwa nguTim Godfrey, owacula loTravis Greene ingoma ethi, ‘Nara Ekelo Mo’.  Ingoma yabo le igxile emazwini la aweHubo 116:12 athi, “Ngingambonga ngani uJehova ngabo bonke ubuhle bakhe kimi?” Baqinisa ukuthi uNkulunkulu kamukele indumiso yabo.

Nginjenje ngangike ngihlale phansi nginakane ngalokho iNkosi esingenzele khona, ngidinge ngiswele ukuthi kambe ngingayibonga ngani. Zinengi izingoma ezihlabelelweni zethu zamahubo eNkosi, kunye lamakhorasi esiwathandayo sicula okufananayo, sisitsho ngomfutho ukuthi uNkulunkulu simnika uqobo lwethu? Kambe? Isibili? Esihlabelelweni esithi, ‘Amagama Okuhlabelela’ likhona iculo 55 elikhangela impilo yeNkosi uJesu Khristu, linanzelela ukuhlupheka kwakhe elenga esiphambanweni. Isihloko salo sithi, ‘Nxa Ngimbona UMsindisi’. Sikulesi isikhathi lapho esikhumbula ngalokho uJesu Khristu asenzela khona eKhalvari. Ungathatha ithuba uhlale phansi ucabangisise ngakho uzwa uphelelwa, usilela, uswela ukuthi uthando olunjengalolo uKhristu alutshengisa ngokuvuma ukuhlutshwa, edelelwa, eseyiswa njalo ecina ebethelwa kabuhlungu esiphambanweni, lichitheka igazi, ungaluhlawula ngani. Luthando bani lolu? Yikuzinikela bani lokhu? UMprofethi u-Isaya wavele waphorofetha okwakuzakwenzakala engakazalwa emhlabeni uJesu Khristu. Waphorofetha lokhu ukuba, “… wagwazwa ngenxa yeziphambeko zethu, wachobozwa ngenxa yokona kwethu, ukuhlutshwa kwakhe kwasilethela ukuthula, njalo sasiliswa ngamanxeba akhe. … Wacindezelwa wahlutshwa, kodwa kawuvulanga umlomo wakhe; wakhokhelwa ukuya bulawa njengewundlu …” u-Isaya 53:5, 7.

Nxa umuntu ekwenzele kuhle umbonga ngazo zonke izangelo zakhe ugomele. Kodwa umuntu onjengeNkosi uJesu Khristu esingamboni ngamehlo, singambonga ngani? Singambonisa njani ukuthi siyamthanda, siyamesaba, siyamdumisa, siyamkhonza njalo sifisa ukuphila ngokwentando yakhe? IHubo 55 engikhulume ngalo liphetha ngala amazwi ayinqaba:

Ngingayisa ntoni kuye

Efanele ukumbonga?

Anginakho okwanele

Ngiyamnik’ uqobo lwami.

Impela? Uyavuma na ukuthi akukho ongambonga ngakho uJehova ngabo bonke ubuhle bakhe kuwe? Uyamnik’ uqobo lwakho na? 

Barbara Nkala