Umnyaka usugoqa. SikuMpalakazi, kodwa izulu lilokhu lithe nya. Komile. Zindlala zodwa. Kutshisa bhe! Isikhudumezi sakhona silahla umuntu phansi. Sicetshiswa ukunatha amanzi njalo nje, loba abanengi bengalawo ahlanzekileyo. Kulokuswela nxazonke. Imali ayikho. Umkhonomi wezwe ulokhu utshona usiya phansi. Inhlupho ezahlukebeyo zibhahile zenza impilo ibe munyu. Yibumayemaye ngapha langapha. Amazwe amanengi aphakathi kwengxabangxoza kwezombangazwe. Kwamanye yizimpi esezibhidlize izakhiwo zabhubhisa abantu, abantwana labadala. Kwenzenjani bo? Akukho ukuthula.

Akukho ukuthula emuntwini. Kukhona ukulwa emoyeni. Ezimulini kuyaxatshanwa. Ezigabeni kulokuxokozela okungapheliyo. Yimpi engapheliyo phakathi kwabantu bakhile. Sithin pho? Siqonde kubani? Siphephele ngaphi? Watsho omunye umhlabeleli ekhuthaza ukubana siphakamisele amehlo ethu koPhezukonke, owadala izulu lomhlaba, ngoba kulapho okuvela khona usizo lwethu. Ngalesi isikhathi umyaka ugoqa, siyakhumbula kakhulu ngekhisimusi. Yisikhathi sokukhumbula ngoJesu Khristu, iNkosi loMsindisi wezimpilo zethu. Sahlengwa ngegazi lakhe esiphambanweni. Wazalelwa khonalokho ukusindisa umhlaba wonke, abantu bonke. Nguye zwi oletha ukuthula ezimpilweni zethu. Nxa sikhumbula ngesikhathi lesi sekhisimusi, umbhalo owaphrofetha kudaladala uthi, “Ngoba sizalelwe umntwana, siphiwe indodana, umbuso uzakuba phezu kwamahlombe akhe. Uzabizwa ngokuthi uMeluleki Omangalisayo, uNkulunkulu uSomandla, uBaba Waphakade, iNkosana yokuThula” u-Isaya 9:6. Lakanye kwaba njengokutsho koMbhalo.

Zingaba khona izivunguzane emoyeni, leziphepho ezifuna ukusiphephuluza empilweni yethu le. Kodwa likhona iThemba lamathemba kuyo iNkosana yokuThula, uJesu Khristu. Ukuthemba yena kuletha ukuthula emoyeni. Kwenza loba siphakathi kokuhlupheka sibambelele sigagadlele kuye ukuze singa muki lezivunguzane zempilo. Singaze sibe lokukhahlamezeka empilweni, sithenjiswa elakusasa elingcono. iNcwadi ithi kasoze asitshiye sisodwa. Uhamba lathi kukho konke. UnguMalusi olungileyo.

Mzalwane, mthembe kukho konke ngoba unguMeluleki Omangalisayo, uNkulunkulu uSomandla, uBaba Waphakade, iNkosana yokuthula. Haleluya! Ngingesabani na?

Barbara Nkala