IZAGA

Isilima libala ebelisetshenziswa izolo nxa kukhulunywa ngabantu abaphila lokukhubazeka. Abazali bangathola umntwana ophila lokukhubazeka, abahlali bekhangele ukukhubazeka lokho. Bacina bemkhangela nje njengomntanabo ofana labanye, bamthande. Ukukhubazeka kwakhe kubonwa ngabanye abantu abangahlali kulelo khaya. Yibo abakunanzelelayo lokho.

Nxa kuthiwa akusilima sindlebende kwaso, kwande ukutshiwo nxa umntwana loba othile enze into embi engathandekiyo kwabanye abantu kuleyo ndawo. Kungaba yinto yokuganga, loba eyangisayo nje. Kusuka abantu abanengi bamnine lowo owenze okubi bangathandi ukuhlanganyela laye. Kodwa, lapho azalwa khona, uyabe engowabo. Bathi umuntu kalahlwa. Loba abanye bengafuni ukumbona loba ukumsondelela, abakwabo bona bama laye ebunzimeni, loba ezidalele lobo bunzima. Lokhu-ke kufana lokuthi nxa umntwana loba umuntu engabe elenzindlebe ezinde ezingajwayelekanga, ezingafani lezabanye, abakwabo bona bayabe bembona ngelihlo elehlukileyo elingakuboniyo lokho kukhubazeka. Bona bayabe bebona ukuthi ungumntanabo abamthandayo. Ngaleyondlela kuyatshiwo ukuba, akusilima sindlebende kwaso.

Barbara Nkala