“Zigqili, lalelani amakhosi enu omhlaba ezintweni zonke; likwenze, hatshi kuphela ngokuba elikhangele loba ukuthi alithande, kodwa ngobuqotho benhliziyo langokuhlonipha iNkosi” kwabaseKholose 3:22.

Umtshumayeli owayegcwele inhlakanipho wayebetha iqiniso elipheleleyo lapho athi akulalutho olutsha ngaphansi kwelanga. Kudala kwakulezigqili ezazisebenza gadalala ngaphansi kwabaninizo, futhi zingaholi, ziphathwa ngochuku. Zikhona lalamhlanje. Emizini eminengi esiyaziyo kulezisebenzi. Zonake kufanele ziphile ngcono kulezigqili ngoba ziqhatshiwe, njalo zithola iholo. Kodwa isixwayiso esiphezulu esiphuma ogwalweni lwabaseKholose siyakhuluma lakumakhosi alamuhla labaqhatshe izisebenzi ngoba zinengi eziphila ngokugqilazwa. Ziyachukuluzwa. Zisebenza kokuphela zingakutholi ukuphumula. Ezinye aziphiwa izimfanelo zazo. Loba kunjalo, umlobi uPhawuli uyaxwayisa ukuba zilalele amakhosi azo, loba abaqhatshi bazo. Okusemqoka njalo yikuthi, akumelanga zisebenze kuhle ngoba amakhosi ezikhangele loba zifuna ukube zithandwe ngabaqhatshi. 

Abanengi bethu sesizibonile izisebenzi ezithile ezenza kuhle ngoba zikhangelwe, kodwa amakhosi angathi sithe, zilahla phansi izikhali zomsebenzi uthole sezicwilise amakhanda kubomakhalekhukhwini, loba ingxoxo isisitsha labangane. Umbhalo uthi, kumele izisebenzi zisebenze ngobuqotho benhliziyo langokuhlonipha iNkosi. Ungakucabangisisa lokho, mina lawe siyizisebenzi ezisebenzela amakhosi athile omhlaba. Amazwi la alayayo aphezu kwethu sonke. Sithembekile na njalo sisebenza ngobuqotho bezinhliziyo langokuhlonipha? Siyabalelwa na kulabo abenza umsebenzi bedinga ukuthabisa lokubukwa baphakanyiswe? Kwakunjalo kudaladala ngezikhathi zeBhayibhili. Kulokhu kunjalo lalamuhla. 

Ayipheleli lapho indaba. UPhawuli uphenduka aqondise ukulaya kwakhe kuwo amakhosi labaqhatshi ngoba njengoba sesike satsho, banengi abaphatha kubi langochuku abantu abasebenzelayo. Bayakhohlwa ukuthi labo ukhona okumele bamgobele benze intando yakhe. Uyalaya-ke esithi, “Makhosi, nikani izigqili zenu okulungileyo lokufaneleyo, ngoba liyakwazi ukuthi lani lileNkosi ezulwini” kwabaseKholose 4:1. Wena lami sileNkosi okumele siyesabe, siyihloniphe siyisebenzele ngobuqotho. UJesu Khristu yiNkosi yeziqgili lamakhosi. 

Ngisiza Nkosi kukho konke engikwenzayo ngikwenze ngobuqotho lokuhlonipha wena. Amen.

Barbara Nkala