Empilweni abantwana beNkosi bayakhahlamezeka ngenxa yomoya kaGoliyathi, ohlezi ubahlukuluza. Umoya kaGoliyathi uchitha ukholo ebantwini ubenze bagedezele ngokwesaba. Umoya kaGoliyathi uyancithika ngokuzazisa, ukuzitshaya isifuba lobuminamina. Ngumoya wokuziphakamisa lokweyisa njalo unyathezela abanye phansi. Ngumoya ozibona ubungcwethi, ongathandi ukubana abanye bephakama loba besenza ngcono.

EBhayibhilini, sibona isiqhwaga seqhawe elinguGoliyathi, uMfilisti, sinqonqoloza sigqabhazela abako-Israyeli sisithi, “Lamhlanje ngiyaweyisa amaviyo ako-Israyeli! Ngiphani umuntu siqondane silwe!” 1 USamuyeli 17:10. Kuthiwa inkosi uSawuli labo bonke abako-Israyeli bathi besizwa amazwi kaGoliyathi uMfilisti, besaba bathuthumela. Kunjalo lempilweni esiyiphilayo. Bakhona abembethe njalo bebuswa ngumoya kaGoliyathi. Kungaba semulini abekhona ocindezela abanye ngenxa yamandla alawo, kumbe ngenxa yemfundo yakhe kumbe inotho yakhe. Onjalo uyesabeka kusweleke ongamphikisa loba amkhuze. Angatsho akutshoyo kaphikiswa. Abanye bonke bahle bangcine eyabo imilomo. Kubomakhelwane, kuzakhamizi, emankampanini loba ezweni, uyabusa umoya kaGoliyathi uthole abantu beqhaqhazela ngokwesaba. Umuntu wonke ulawulwa yintando yalowo loba labo ababuswa ngumoya kaGoliyathi. Akekho ovula owakhe athi nkente! Lemhlabeni wonke sesibabonile ababusithile abembathe umoya kaGoliyathi. Ngontando ayiphikiswa. Bachothoza abanye ababusi labantu babo. Bazibona sengathi yibo onkulunkulu.

ENcwadini, sizwa kuthiwa ama-Israyeli alanyulelwa kulesisiqhwaga esasesibathwalise qatha ngumfana owayengumalusi wezimvu, uDavida. Wamangala ukubona umuntu othuka abantwana beNkosi engagqize qhakala. UGoliyathi wakhangela umfana uDavida njengoguyuguyu wagqabhaza njengenjwayelo. Kodwa sitshelwa ukuba umfana waphendula wathi, “Wena uzemelana lami ngenkemba lomkhonto kanye lomdikadika, kodwa mina ngizemelana lawe ngebizo likaJehova uSomandla, uNkulunkulu wamabutho wena omeyisayo. Lamhla uJehova uzakunikela kimi, ngizakulahla phansi ngiqume ikhanda lakho. … Bonke labo ababuthene lapha bazakwazi ukuthi uJehova kahlengi ngenkemba loba ngomkhonto, ngoba impi ngekaJehova, njalo lonke uzalinikela ezandleni zethu” 1 USamuyeli 17:45 – 47. 

Lakanye umfana uDavida wasilahla phansi isiqhwaga esinguGoliyathi ngesavutha lelitshe elilodwa zwi. UDavida wanqoba ngokuthemba uJehova. Impi yayingesiyo ekaDavida. YayingekaJehova. Wena-ke? Uthembe bani?   Ngubani ozakulwela lapho uhlaselwa ngabalomoya kaGoliyathi? Themba iNkosi ephilayo. Zehlise uzithobe! INkosi izakulwela. Musa ukwesaba. Nqoba umoya kaGoliyathi ngebizo likaJehova uSomandla!

Barbara Nkala